Поиск по архиву

Последование молебна преподобному Пафнутию Боровскому мирским чином (без священника)

Последование молебна

преподобному Пафнутию Боровскому

мирским чином (без священника)

 

Стаpший: Молитвами святых отец наших, Господи Иисусе Христе Боже наш, помилуй нас.                                                                      

Чтец: Аминь. Слава Тебе, Боже наш, слава Тебе.

Царю Небесный, Утешителю, Душе истины, Иже везде сый и вся исполняяй, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.

Трисвятое, по Отче наш:

Стаpший: Молитвами святых отец наших, Господи Иисусе Христе Боже наш, помилуй нас.

Господи, помилуй. 12 раз.

Слава Отцу и Сыну и Святому Духу, и ныне и присно, и во веки веков. Аминь.

Приидите, поклонимся Цареви, нашему Богу.

Приидите, поклонимся и припадем Христу Цареви, нашему Богу.

Приидите, поклонимся и припадем Самому Христу, Цареви и Богу нашему.

И чтем псалом 142: Господи, услыши молитву мою, внуши моление мое во истине Твоей, услыши мя в правде Твоей и не вниди в суд с рабом Твоим, яко не оправдится пред Тобою всяк живый. Яко погна враг душу мою, смирил есть в землю живот мой, посадил мя есть в темных, яко мертвыя века. И уны во мне дух мой, во мне смятеся сердце мое. Помянух дни древния, поучихся во всех делех Твоих, в творениих руку Твоею поучахся. Воздех к Тебе руце мои, душа моя, яко земля безводная Тебе. Скоро услыши мя, Господи, исчезе дух мой, не отврати лица Твоего от мене, и уподоблюся низходящым в ров. Слышану сотвори мне заутра милость Твою, яко на Тя уповах. Скажи мне, Господи, путь воньже пойду, яко к Тебе взях душу мою. Изми мя от враг моих, Господи, к Тебе прибегох. Научи мя творити волю Твою, яко Ты еси Бог мой. Дух Твой Благий наставит мя на землю праву. Имене Твоего ради, Господи, живиши мя, правдою Твоею изведеши от печали душу мою. И милостию Твоею потребиши враги моя и погубиши вся стужающыя души моей, яко аз раб Твой есмь.

Слава Отцу и Сыну и Святому Духу, ныне и присно, и во веки веков. Аминь.

Аллилуйя, аллилуйя, аллилуйя, слава Тебе, Боже! (Трижды) 

И возглашает канонарх во глас тропаря:

Бог Господь и явися нам, благословен грядый во имя Господне.

И стихи: 1. Исповедайтеся Господеви, яко благ, яко в век милость Его.

2. Обышедше обыдоша мя, и именем Господним противляхся им.

3. Не умру, но жив буду, и повем дела Господня.

4. Камень, егоже небрегоша зиждущии, Сей бысть во главу угла, от Господа бысть Сей, и есть дивен во очесех наших.

Мы же припеваем к коемуждо стиху: Бог Господь и явися нам, благословен грядый во и мя Господне.

Таже тропарь гл.4: Жития светлостию просветив твое отечество, в молитвах и постех дарований Божественнаго Духа исполнился еси, и во временней сей жизни добре подвизався, милости благоутробия всем скорбящим отверзл еси, и нищим был еси заступник. Тем молим тя, отче Пафнутие, моли Христа Бога, да спасет души наша.

Слава Отцу и Сыну и Святому Духу, и ныне и присно, и во веки веков. Аминь.

Богородичен, гл. 4: К Богородице прилежно ныне притецем, грешнии и смиреннии, и припадем, в покаянии зовуще из глубины души: Владычице, помози, на ны милосердовавши, потщися, погибаем от множества прегрешений, не отврати Твоя рабы тщи, Тя бо и едину надежду имамы.

И псалом 50: Поми́луй мя, Бóже, по вели́цей ми́лости Твоéй, и по мнóжеству щедрóт Твои́х очи́сти беззакóние моé. Наипáче омы́й мя от беззакóния моегó, и от грехá моегó очи́сти мя; я́ко беззакóние моé аз знáю, и грех мой прéдо мно́ю есть вы́ну. Тебé еди́ному согреши́х и лукáвое пред Тобóю сотвори́х; я́ко да оправди́шися во словесéх Твои́х, и победи́ши внегдá суди́ти Ти. Се бо в беззакóниих зачáт есмь, и во гресéх роди́ мя мáти моя́. Се бо и́стину возлюби́л еси́; безвéстная и тáйная прему́дрости Твоея́ яви́л ми еси́. Окропи́ши мя иссóпом, и очи́щуся; омы́еши мя, и пáче снéга убелю́ся. Слу́ху моему́ дáси рáдость и весéлие; возрáдуются кóсти смирéнныя. Отврати́ лицé Твоé от грех мои́х и вся беззакóния моя́ очи́сти. Сéрдце чи́сто сози́жди во мне, Бóже, и дух прав обнови́ во утрóбе моéй. Не отвéржи менé от лицá Твоегó и Ду́ха Твоегó Святáго не отыми́ от менé. Воздáждь ми рáдость спасéния Твоегó и Ду́хом Влады́чним утверди́ мя. Научу́ беззакóнныя путéм Твои́м, и нечести́вии к Тебé обратя́тся. Избáви мя от кровéй, Бóже, Бóже спасéния моегó; возрáдуется язы́к мой прáвде Твоéй. Гóсподи, устнé мои́ отвéрзеши, и устá моя́ возвестя́т хвалу́ Твою́. Я́ко áще бы восхотéл еси́ жéртвы, дал бых у́бо: всесожжéния не благоволи́ши́. Жéртва Бóгу дух сокрушéн; сéрдце сокрушéнно и смирéнно Бог не уничижи́т. Ублажи́, Гóсподи, благоволéнием Твои́м Сиóна, и да сози́ждутся стéны Иерусали́мския. Тогдá благоволи́ши жéртву прáвды, возношéние и всесожегáемая; тогдá возложáт на алтáрь Твой тельцы́.

Пе́снь 1

Припев: Преподобне отче наш Пафнутие, моли Бога о нас.

Но́во тебе́ пе́ние принести́ моле́бно во отверзе́ние у́ст мои́х, Пафну́тие  богому́дре, пода́ждь ми́ твои́ми моли́твами благода́ть, да воспою́ тя́.

Припев: Преподобне отче наш Пафнутие, моли Бога о нас.

Страсте́й омраче́нием порабоще́на, о́тче, све́тлыми твои́ми моли́твами, преподо́бне Пафну́тие, ны́не свободи́, да я́ко Христо́ва тя́ раба́ боже́ственными воспою́ пе́сньми, я́ко просла́вися.

Слава: Христу́ прилепля́яся от ю́ности, блаже́нне, умо́м очище́нным, чистото́ю и целому́дрием теле́сным ду́шу просвети́л еси́, я́ко безпло́тен, на земли́ пожи́в. И ны́не в вы́шних Бо́гови предстоя́, на́с, чту́щих тя́, помина́й.

И ныне: Яви́лася еси́ вы́шши а́нгел, Бо́га вопло́щши ро́ждшагося, и погребе́на, и ме́ртвым нетле́ние, Де́во Чи́стая, пода́вшаго, Его́же моли́ спасти́ на́с, ве́рно чту́щих Тя́.

Пе́снь 3

Припев: Преподобне отче наш Пафнутие, моли Бога о нас.

Боже́ственным светоли́тием, богому́дре, просвеща́емь, о́тче преблаже́нне, све́тлое, и светоно́сное твое́, и честно́е успе́ние любо́вию чту́щия, преподо́бне, твои́ми моли́твами просвети́.

Припев: Преподобне отче наш Пафнутие, моли Бога о нас.

Ума́ твоего́ о́ко, преподо́бне о́тче, от страсте́й мглы́ очи́стив, Пресвято́му Ду́ху прия́тно чи́стым блиста́нием соде́лал еси́, богоблаже́нне.

Слава: Тве́рдостию ра́зума укрепля́емь, всеблаже́нне, разли́чная мечта́ния враго́в обличи́л еси́, му́дре, и горды́ню те́х возвы́шенную низложи́л еси́, преподо́бне.

И ныне: И́же пре́жде ве́к рожде́йся от Отца́, и напосле́док неизрече́нно из утро́бы Твоея́ про́йде, и обожи́ на́ше естество́, Ма́ти Де́во, преподо́бных ли́ки я́ве изводя́й.

Моли Бога о нас, преподобне отче наш Пафнутие, яко мы усердно к тебе прибегаем, скорому помощнику и молитвеннику о душах наших.

Таже: Господи, помилуй. (Трижды).Слава Отцу и Сыну и Святому Духу, и ныне и присно, и во веки веков. Аминь.

Седа́лен, гла́с 8:

От ю́ности, блаже́нне, вся́ оста́вль жите́йская, кра́сная же и ле́потная, усе́рдно после́довал еси́ Христу́, зва́вшему тя́, преподо́бне, посто́м, о́тче, те́ло изнури́л еси́, в моли́твах непреста́нно бдя́. Те́мже тя́ Всеве́дый Госпо́дь до́бре устроя́ет па́стыря Свои́м овца́м слове́сным, Пафну́тие богоно́се, моли́ Христа́ Бо́га грехо́в оставле́ние пода́ти чту́щим любо́вию святу́ю па́мять твою́.

Сла́ва, и ны́не: Я́ко де́ву и еди́ну в жена́х, Тя́, без се́мене ро́ждшую Бо́га пло́тию, вси́ ублажа́ем, ро́ди челове́честии: о́гнь бо всели́ся в Тя́ Божества́, и я́ко Младе́нца млеко́м пита́еши Зижди́теля и Го́спода. Те́м, а́нгельский и челове́ческий ро́д, досто́йно сла́вим пресвято́е Рождество́ Твое́ и согла́сно вопие́м Ти́: моли́ Христа́ Бо́га согреше́ний оставле́ние дарова́ти покланя́ющимся ве́рою пресвято́му Рождеству́ Твоему́.

Пе́снь 4

Припев: Преподобне отче наш Пафнутие, моли Бога о нас.

Зако́н Бо́жий сохраня́я невреди́мо, преподо́бне, чистоту́ и смиренному́дрие ты́ от младе́нства име́л еси́, и житие́ нескве́рно, и нра́в ми́лостивен, досточу́дне.

Припев: Преподобне отче наш Пафнутие, моли Бога о нас.

Возвы́сил еси́ к Бо́гу серде́чное жела́ние, и смири́л еси́ па́губныя стра́сти, и лука́вствия бесо́в низложи́л еси́, преподо́бне, мона́шествующих недви́жимое основа́ние.

Слава: В нищете́ пожи́в, блаже́нне, доброде́тельми обогати́лся еси́, и, жития́ све́тлостию бы́в испо́лнен, преста́вился еси́ к вы́шнему гра́ду, о́тче Пафну́тие, и мо́лишися изба́витися от бе́д ста́ду твоему́.

И ныне: Святы́х Свята́го па́че смы́сла и естества́ породила́ еси́, Богоро́дице, освяще́ние, и избавле́ние, и оставле́ние грехо́в ве́рным хода́тайством Твои́м подаю́щи, Его́ сла́вящим воскресе́ние.

Пе́снь 5

Припев: Преподобне отче наш Пафнутие, моли Бога о нас.

Оте́ц си́рым бы́л еси́ и пита́тель вдови́цам, скорбя́щим утеше́ние, оби́димым помо́щник, па́стырь и наста́вник ста́ду твоему́, преподо́бне Пафну́тие, и ны́не приле́жно моли́ся Влады́це о на́с.

Припев: Преподобне отче наш Пафнутие, моли Бога о нас.

И́нок и́стинен бы́л еси́, простра́ннаго пути́ удаля́яся, те́сный предпочита́я, дости́гл еси́ широты́ ра́йския и дре́ва жи́зни причаща́ешися, но и на́с, ве́рою чту́щих тя́, помина́й.

Слава: Се́рдце твое́ скрижа́ль чи́сту наше́дши, благода́ть Свята́го Ду́ха, о́тче Пафну́тие, обре́те, дарова́ тебе́ соверше́нно безстра́стие, ве́ру тве́рду и любо́вь нелицеме́рну.

И ныне: Свяще́ния се́нь явля́ешися, Мари́е, оскверне́нную сластьми́ окая́нную мою́ ду́шу освяти́ и Боже́ственныя сла́вы прича́стника мя́ сотвори́.

Пе́снь 6

Припев: Преподобне отче наш Пафнутие, моли Бога о нас.

Стра́хом Христо́вым утверди́вся, преподо́бне, те́ло, и ду́шу, и у́м очи́стил еси́ от вся́кия скве́рны, и́миже зарю́ прия́т трисо́лнечную, богому́дре о́тче Пафну́тие всеблаже́нне.

Припев: Преподобне отче наш Пафнутие, моли Бога о нас.

Ве́сь распя́лся еси́ ми́рови, о́тче Пафну́тие, Кре́ст Христо́в на ра́мо взе́м, блаже́нне, и Того́ страсте́м подо́бяся, прича́стник бы́л еси́ воскресе́ния и сла́вы лу́чшия, в не́йже на́с помина́й.

Слава: Хра́м тя́, вси́ ве́рнии, Свята́го Ду́ха ве́мы, хра́м бо благоле́пен воздви́гл еси́ Бо́гу, и Того́ Ро́ждшей именова́л еси́, и огра́ду ве́лию устро́ил еси́, и мона́хов мно́жество совокупи́л еси́. И ны́не моли́твами твои́ми вся́к неду́г отгоня́ется.

И ныне: Ви́девши, Его́же родила́ еси́, Бо́га, от ме́ртвых воста́вша, ра́дости испо́лнилася еси́, Де́во Ма́ти Мари́е. Того́ у́бо моли́ вся́ку печа́ль, Чи́стая, на́шего се́рдца до конца́ потреби́ти.

Конда́к, гла́с 8.

Бо́жиим светоли́тием просвеще́н, о́тче, по́стническое стяжа́в жи́тельство, преподо́бне, и́ноком предо́брый наста́вниче и по́стником благо́е украше́ние. Сего́ ра́ди Госпо́дь, труды́, твоя́ ви́дев, чуде́с да́ром обогати́ тя́, источа́еши бо исцеле́ния. Мы́ же, ра́дующеся, вопие́м ти́: ра́дуйся, о́тче Пафну́тие.

И́кос:

Пе́снь от усте́н скве́рных к похвале́нию по́двиг твои́х, о́тче, прино́сится: не и́мам бо се́рдца моего́ чи́стаго, я́ко сие́ сра́мными дея́ньми оскверни́х и ду́шу лука́выми по́мыслы осмради́х. Но ты́ пода́ждь ми́ сло́во, преподо́бне, чи́стое твое́ воспе́ти житие́, взыва́ющу тебе́ такова́я, преблаже́нне: ра́дуйся, преподо́бных все́х похвало́; ра́дуйся, по́стников подража́телю и пусты́ни насади́телю; ра́дуйся, я́ко в не́й прече́стен хра́м Богоро́дице воздви́гл еси́; ра́дуйся, я́ко в не́м тобо́ю Бо́г сла́вится; ра́дуйся, до́бре пасы́й ста́до твое́ от наве́т вра́жиих; ра́дуйся, я́ко смири́л еси́ злонача́льнаго врага́; ра́дуйся, я́ко посрами́л еси́ бесо́в полки́; ра́дуйся, мона́шествующих свети́льниче пресве́тлый и сто́лп терпе́ния; ра́дуйся, я́ко собра́л еси́ мона́хов мно́жество во спасе́ние; ра́дуйся, о не́мже хва́лимся вси́; ра́дуйся, его́же ра́ди избавля́емся от бе́д; ра́дуйся, о́тче Пафну́тие.

Пе́снь 7

Припев: Преподобне отче наш Пафнутие, моли Бога о нас.

Смотря́я бу́дущую жи́знь, блаже́нне, ми́рови умертви́лся еси́ вои́стинну, я́ко со́лнце, возсия́в. Стра́х Бо́жий восприи́м в се́рдцы твое́м, вселе́нную всю́ возвесели́л еси́ уче́ньми, вопия́: благослове́н Бо́г оте́ц на́ших.

Припев: Преподобне отче наш Пафнутие, моли Бога о нас.

Зря́ муче́ния та́мошняя мы́сленныма очи́ма и се́рдцем боле́знуя вы́ну, чи́сто житие́ пожи́л еси́, богоблаже́нне, и к нестаре́ющейся преста́вился еси́ пи́щи, в не́йже на́с, чту́щих тя́, помина́й.

Слава: Украси́в доброде́тельми твое́ житие́, свя́то сконча́в твою́ жи́знь, усну́л еси́, преподо́бне, со́н ми́рен. Те́мже спаса́й ста́до твое́ всегда́, твою́ па́мять пра́зднующия и вопию́щия: благослове́н Бо́г оте́ц на́ших.

И ныне: Прему́дрость Ипоста́сную и Сло́во присносу́щное, Врача́ душа́м и те́лом поро́ждшая, я́звы и гное́ния души́ моея́ уврачу́й, лю́тыя и ле́тния се́рдца моего́ исцели́ боле́зни, Де́во.

Пе́снь 8

Припев: Преподобне отче наш Пафнутие, моли Бога о нас.

Подвиза́вся на земли́ зако́нно, ны́не ра́дуешися, преподо́бне, со святы́ми, небе́сный обре́т поко́й, и соприча́стник бы́л еси́ весе́лия те́х и ра́дости, взыва́я: лю́дие, превозноси́те Го́спода во ве́ки.

Припев: Преподобне отче наш Пафнутие, моли Бога о нас.

Посто́м у́м очища́я, кро́ток и незло́бив я́влься, на земли́ кро́тких живе́ши, богому́дре, со все́ми пра́ведными и избра́нными поя́: лю́дие, превозноси́те Го́спода во ве́ки.

Слава: Олядене́вшую страстьми́ ду́шу мою́ очи́сти твои́ми к Бо́гу свяще́нными моли́твами и содержа́щаго мя́ грехо́внаго плене́ния изба́ви, о́тче Пафну́тие богоно́се, да, ра́дуяся, пою́: лю́дие, превозноси́те Го́спода во ве́ки.

И ныне: Пощади́ на́с, пою́щих Твое́, Го́споди, е́же от Де́вы, неизрече́нное рождество́, и изба́ви от стра́стных бе́д и скорбе́й рабы́ Твоя́ мольба́ми Пречи́стыя Твоея́ Ма́тере, я́ко Милосе́рд и еди́н Человеколю́бец.

Пе́снь 9

Припев: Преподобне отче наш Пафнутие, моли Бога о нас.

Я́ко у́тро, я́ко со́лнце, возсия́вши, па́мять твоя́, преподо́бне, ве́рных сердца́ просвеща́ет и тму́ отгоня́ет душетле́нных страсте́й, ю́же соверша́юще, благоче́стно восхваля́ем тя́ ра́достными пе́сньми.

Припев: Преподобне отче наш Пафнутие, моли Бога о нас.

Я́ко в раи́, о́тче, воздержа́ния процве́л еси́ и, я́ко ма́слина, псало́мски яви́лся еси́, ли́ца и сердца́ на́ша помазу́я еле́ем трудо́в твои́х, о́тче Пафну́тие, благоче́стно чту́щих свяще́нную па́мять твою́.

Слава: Дне́сь на́м возсия́ честна́я па́мять твоя́, преблаже́нне, просвеща́ющи ду́ши и телеса́ и страсте́й мглу́ отгоня́щи, преподо́бне, пода́ждь моли́твы твоя́, Пафну́тие о́тче, и наста́ви на стезю́ жи́зни. Те́мже, досто́йно чту́ще тя́, велича́ем.

И ныне: Прие́мли, Пречи́стая Отрокови́це, боже́ственную пе́снь, воздаю́щи благода́ть на Тя́ наде́ющимся, и ми́р испроси́ Це́рквам при́сно пода́ти, да вся́к язы́к христиа́нский Тя́ велича́ет.

Досто́йно есть я́ко вои́стину блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Трисвятое, по Отче наш:

Стаpший: Молитвами святых отец наших, Господи Иисусе Христе Боже наш, помилуй нас.

Кондак, глас 8: Божиим светолитием просвещен, отче, постническое стяжал еси жительство, преподобне, иноком предобрый наставниче и постником благое украшение. Сего ради Господь труды твоя видев, чудес даром обогати тя, источаеши бо исцеления. Мы же, радующеся, вопием ти: радуйся, отче Пафнутие.

Слава Отцу и Сыну и Святому Духу, и ныне и присно, и во веки веков. Аминь.

Богородичен, глас 6: Не имамы иныя помощи, не имамы иныя надежды, разве Тебе, Владычице. Ты нам помози, на Тебе надеемся и Тобою хвалимся, Твои бо есмы раби, да не постыдимся.

Таже: Господи, помилуй. 40 раз.

Слава Отцу и Сыну и Святому Духу, и ныне и присно, и во веки веков. Аминь.

Преподобне отче наш Пафнутие, моли Бога о нас.

Посем молитва: О священная главо, земный Ангеле, Небесный человече, великий чудотворче, преподобне отче наш Пафнутие. К тебе с верою и любовию усердно прибегаем и умиленно твоего заступления просим. Не дерзаем, грех ради наших, с свободою чад Божиих Господа и Владыку нашего о помиловании и прощении просити. Но тебе, молитвенника к Нему благоприятна, предлагаем и молим:

Испроси нам у благости Его да́ры благопотребныя и спасительныя душам нашим: веру праву, во благочестии крепкое стояние, грехов прощение, жития совершенное исправление. Да, обратившеся от злых дел к богоугождению, прочее не прогневляем Господа святых Его заповедей преступлением. Умоли, святче Божий, Всевышняго Творца даровати мир и благочестие стране нашей православной. Сохрани, угодниче Христов, святую обитель твою, тобою созда́нную, и вся живущия и подвизающияся в ней от всякаго зла ненаветны. Призри милостивно на люди, раце мощей твоих предстоящия, и вся прошения их во благое исполни. Нам же всем здравие душевное и телесное, земли плодоносие, тихое и богоугодное житие, благую, христианскую кончину и добрый ответ на Страшнем Суде у Всемилостиваго Бога исходатайствуй.

Ей, отче, вемы, яко много может молитва твоя пред лицем Вседержителя Господа и ничтоже невозможно есть ходатайству твоему, аще токмо восхощеши; сего ради крепце на тя уповаем и на твоя святыя молитвы вельми́ надеемся, яко ты приведеши нас предстательством твоим в тихое пристанище спасения и наследники явиши ны светлаго Царствия Христова. Не посрами же упования нашего, чудотворче святый, и сподоби нас вкупе с тобою блаженства райскаго наслаждатися.

Да славим, хвалим и величаем великую милость к нам Человеколюбца Бога, Отца, и Сына, и Святаго Духа, и твое благое, отеческое заступление во веки веков. Аминь.

Честнейшую Херувим и славнейшую без сравнения Серафим, без истления Бога Слова рождшую, сущую Богородицу, Тя величаем.

Слава Отцу и Сыну и Святому Духу, и ныне и присно, и во веки веков. Аминь.

Господи, помилуй. Трижды. Господи, благослови.

Стаpший: Молитвами святых отец наших, Господи Иисусе Христе Боже наш, помилуй нас.

Чтец: Аминь.

Величание: Ублажаем тя, преподобне отче наш Пафнутие, и чтим святую память твою, наставниче монахов и собеседниче Ангелов.

Православный календарь



История монастыря, старые фотографии и древние находки - все это в нашем музее Здесь вы найдете информацию для паломников Здесь можно заказать ночлег Подворье монастыря, где первоначально подвизался преподобный Пафнутий и откуда пришел в это место Монастырь ждет благочестивых паломников потрудиться во славу Божию.